கட்டுரை – எச்.பீர்முகம்மது – யூப்ரடீஸ் மற்றும் டைக்ரீஸ் நதிக்கரை நாகரீகங்களின் தோற்றமும் பரிணாமமும் – குர்திஷ் தலைவர் ஒசலானின் சிந்தனைகளிலிருந்து

 

 

யூப்ரடீஸ் மற்றும் டைக்ரீஸ் நதிக்கரை நாகரீகங்களின் தோற்றமும் பரிணாமமும்குர்திஷ் தலைவர் ஒசலானின் சிந்தனைகளிலிருந்து

 

-எச்.பீர்முஹம்மது

 

 

 

 

 

 

 

 

 

 

 

 

 

 

மனித இன வரலாற்றில் நதிக்கரைகள் முக்கியமானவை. அதுவும் பாரம்பரிய நதிகள் வரலாற்றில் மிக மிக உயிரோட்டமானவை. அவை வரலாற்று அறிவின் அடிப்படையில் நாகரீகங்களின் பிறப்பிடமாக , அவற்றை செழுமையாக்கிய, அதன் போக்கை தீர்மானித்த ஒன்றாக, அதன் சிறந்த தொடர்பு ஊடகங்களாக நதிகள் இருந்திருக்கின்றன. இந்நிலையில் வரலாற்று கால ஈராக்கின், சுமேரியா நாகரீகத்தை தோற்றுவித்த பாரம்பரிய நதிகள் யூப்ரடீஸ் மற்றும் டைக்ரீஸ் இன்றும் தொடர் வரலாற்று சாட்சியாக இருந்து கொண்டிருக்கிறது. ஒசலான் தன் நாகரீகங்களின் வேர்கள் (Roots of Civilization)என்னும் நூலில் இதைப்பற்றி விரிவாக ஆராய்ந்தார். ஈராக்கின் இரு மலைத்தொடர்களின் நடுவே பெரும் நீரோட்டமாக அமைந்திருக்கும் இந்த பாரம்பரிய நதிகள் ஒரு வரலாற்றுக்குறிப்பின் படி முதல் நாகரீகமாக அறியப்படுகிறது. இதன் முதல் கட்ட வளர்ச்சிப்போக்கு என்பது சிக்கலான அரசியல் கட்டமைப்பை கொண்டிருந்து மனித குல வரலாற்றின் மிகப்பெரும் திருப்பு முனையாக இருக்கிறது. நாம் வரலாற்றில் அறிந்திர முடியாத ஒன்றின் வெளிப்பாடாக இவற்றின் தொடர்ச்சி இருந்து கொண்டிருக்கிறது. மேலும் சுமேரியர்கள் மற்றும் அவர்களின் அரசை பற்றி அறிய வேண்டுமானால் நாம் நடப்பு காலம் பற்றியும், நம்மைப்பற்றியும் முதலில் கற்றுக்கொள்ள வேண்டும். காரணம் மிக எளிமையானதே. வரலாற்று ஆய்வுகள் மற்றும் வரலாற்றை வரலாறாக பதிவு செய்தல் இவற்றின் நாம் மிகப்பெரும் பலவீனமாக இருக்கிறோம். அப்படிப்பட்ட பலவீனமே நம்மை வரலாற்றறிவை உட்கிரகிக்க தடையாக இருக்கிறது. ஒருவேளை இந்த இருநதிகள் தோற்றுவித்த சுமேரிய நாகரீகம் தான் உலகின் முதல் நாகரீகமாக கூட இருக்கலாம். அவை நம் கலாசார நினைவிலிருந்து எவ்வித வரலாற்று கேள்விகளுமற்று தூரமாகி போய்விட்டன. இந்நிலையில் சுமேரியர்கள் நம் காலத்தின் நேற்றாக இருக்கிறார்கள். அவ்வகையில் அவர்கள் நமக்கு, நம் கலாசாரத்திற்கு மிக நெருக்கமாக இருக்கின்றனர் என்றார் ஒசலான்.

 

 

 

முந்தைய வரலாற்று தரவுகளின் படி விவசாயம் மற்றும் கால்நடை வளர்ப்பு ஆகியவை யூப்ரடீஸ் நதிப்பகுதியில் இருந்திருக்கின்றன. இது நவகற்காலத்தை பிரதிபலித்தது. உணவு உற்பத்தி மற்றும் கால்நடை வளர்ப்பு கிராமப்புற வாழ்க்கையை நோக்கி அவர்களை நகர்த்தியது. கிராமம் அதன் சரியான வடிவத்தில் உருவான இடம் இது தான். இது மெசபடோமிய நாகரீகத்தின் வாழ்வியல் காட்சி படிமம்.இவை பத்தாயிரம் ஆண்டுகள் முந்தைய வரலாற்றை உடையவை. இப்பிராந்தியத்தின் அல்லது இதனோடு தொடர்புடைய பிராந்தியங்களின் நாகரீக கூறுகள் பல மண்ணுக்குள் புதைந்து விட்டன. அவையும் நவ கற்காலத்தை சார்ந்தவை தான். அவற்றுள் வரலாற்றுக்கால குர்து பிரதேசமும் ஒன்று. இந்த புதைபாடுகளுக்குள் கிழக்கு அரேபிய பிரதேசமும் மாட்டிக்கொண்டது. அவற்றின் கலாசார புதுமைகள் தான் பிந்தைய கட்டத்தில் தூர பிரதேசங்களுக்கு இடமாற்றம் செய்யப்பட்டன. இவைகளின் சமூக விரிவாக்கம் கிமு 7 ஆம் நூற்றாண்டிலிருந்து கிமு 4 ஆம் நூற்றாண்டு வரையிலான பொருளாயத அடிப்படைகளை கொண்டது. இந்த கலாசாரங்கள் பாரம்பரிய, வளமான யூப்ரடீஸ் மற்றும் டைக்ரீடிஸ் நதிக்கரையால் வளர்க்கப்பட்டவை. மெசபடோமியாவின் நவ கற்கால சமூகங்கள் தங்கள் நாகரீகத்தை உயர்த்துவதற்கான பல்வேறு விதமான செயல்பாடுகளில் இறங்கின. ஓவிய கவிதைகள், செம்மறி ஆட்டுத்தோலை வைத்து ஆடை நெய்தல்,தானியங்களை அரைத்தல், கோடறி மற்றும் உழுவதற்கான கலப்பையை உருவாக்குதல், செங்கல் சூளை, உலைகள், புனித தலங்களை உருவாக்குதல் போன்ற பல்வேறுவிதமான பணிகளில் இறங்கின. அவர்களின் மத நம்பிக்கைகள் வித்தியாசமாக இருந்தன. வித்தியாசமான குறியீடுகள், பெண் தெய்வ வழிபாடு போன்றவை தொடர்ந்திருந்தன. ஆக மெசபடோமியாவுடன் தொடர்புடைய பகுதிகள் “வரலாற்றின் விடியல்” என்று நம்பப்படுகின்றன.

 

 

 

உபய்த் மற்றும் உர்க் சமூகங்கள் அதாவது கிமு ஐந்தாம் நூற்றாண்டிலிருந்து நான்காம் நூற்றாண்டு வரை மத்திய கிழக்கின் ஒரு பகுதியை ஆட்சி செய்த உபய்த் சமூகம் சதுப்பு நிலங்களில் பயிர் செய்து அதிக மகசூலை ஈட்டியது.பாசன கால்வாய்கள் அமைக்கப்பட்டதன் மூலம் விவசாயத்திற்கு தேவையான தண்ணீர் உரிய நேரத்தில் எவ்வித காத்திருப்பும் இல்லாமல் உடனடியாக விளைநிலங்களுக்கு போய் சேர்ந்தது. இம்மாதிரியான சாதனைகளால் வரலாற்றாசிரியர்கள் சுமேரியாவை “வரலாறு சுமேரியாவிலிருந்து பிறந்தது ” என்பதாக குறிப்புணர்த்துகிறார்கள். ஆக நாகரீகத்தை நாம் பலவிதமான வழிகளிலும் வரையறுக்கலாம். அதில் முக்கியமான குணாதிசயம் என்பது மனித உழைப்பு. அன்றைய உடனடி தேவைகளுக்கான உற்பத்தி போக மற்றவை உபரியாக பராமரிக்கப்பட்டன. அவை ஒரு குழுவால் மேலாண்மை செய்யப்பட்டன. இவ்வாறான உற்பத்தி பரிமாற்றம் மனித உறவுகளை அறிமுகம் செய்தது மட்டுமல்லாமல் அவை சொத்து என்பதன் வடிவத்தையும் தோற்றுவித்தன. இதன் தர்க்க ரீதியான தொடர்ச்சி அக்கால நாகரீக மனிதனை பல்வேறுவிதமான கட்டிடங்கள், தொழில் மையங்கள் போன்றவற்றை தோற்றுவிக்க செய்தன. இவை அரசு என்பதன் அதிகார வடிவத்தை நோக்கி நகர்ந்தன. அரசானது மக்கள் மனதில் சமூக மேலாண்மையை ஏற்படுத்தியது. அதனோடு அரசியல் அதிகாரத்தனத்திற்கு முக்கிய கூறாக மாறியது. அடிமை உழைப்பு அன்றைய கட்டத்தில் மிகப்பெரும் உற்பத்திக்கருவியாக இருந்தது. அந்த கருவியானது சமூகத்திற்கு தேவையானவற்றை உற்பத்தி செய்வதுடன், உபரியாகும் பொருட்களை சேமிக்கவும் கற்றிருந்தது. மற்றொரு நிலையில் சுமேரிய சமூகத்தில் ஒழுக்கம், அறம் மற்றும் ஆன்மா குறித்த கருத்தாக்கங்கள் பரவி கிளைத்தன. இவை அந்த சமூகத்தை வேறொரு கட்டத்திற்கு நகர்த்தின. பல பெண் தெய்வங்கள் உருவாக்கப்பட்டன. அவை பிந்தைய கட்டத்தில் தெய்வீக அந்தஸ்தை  பெற்றது.

 

 

 

ஆரம்பகால மெசபடோமிய நாகரீகத்தை பொறுத்தவரை , வரலாற்று வளர்ச்சிக்கு அதன் பங்களிப்பானது க்யூனிபாம் என்ற உயர்தர எழுத்துவகைகளை கண்டறிந்தது. கணிதம், வானவியல் மற்றும் நாட்காட்டி போன்றவற்றை கண்டறிந்தது ஆகியவற்றை குறிப்பிடலாம். இம்மாதிரியான செயல்பாடுகள் மூலம் சுமேரியர்கள் தங்களை உயர்த்திக்கொணடார்கள். பிந்தைய காலகட்டத்தில் மெசபடோமியா நாகரீகம் நகர வாழ்க்கையில் நெடியோடு மாறியது. பல கைவினைப்பாடுகள், மையப்படுத்தப்பட்ட தொழில் நிறுவனங்கள் ஆகியவற்றை உள்ளடக்கியதாக மாறியது. தொன்மம் சார்ந்த கவிதைகள், பாடல்கள், இசை போன்றவைகள் அவர்களை அடுத்த கட்டம் நோக்கி நகர்த்தின. அடிப்படையில் இது நாகரீக சமூகத்தின் குறிப்பான தோற்றத்திற்கு தொடக்கம் குறிக்கிறது. மெசபடோமிய, சுமேரிய நாகரீகங்களின் அறிவுத்துறை சார்ந்த வரலாறுகள் பல அழிக்கப்பட்டு விட்டன.  அவற்றின் எச்சங்கள் மட்டுமே தற்போது நிலவுகின்றன. மேலும் கிரீக் மற்றும் ரோம நாகரீகங்கள் சுமேரிய நாகரீகத்திற்கு ஆற்றிய பங்களிப்பிற்கான ஆதாரங்கள் வரலாற்றிலிருந்து மறைந்தோடி விட்டன. சமூகமயமாக்கல் செயல்முறை தொடங்கிய போது அவை தங்களை ஒருங்கிணைப்பதற்கான பிரக்ஞையை அடைந்தது. மனிதனின் தோற்றம் தொடங்கி அவனின் மூளையானது குறிப்பிட்ட நிலைக்கு வளர்ச்சி அடைந்த போது, அது தன்னை வளப்படுத்துவதற்காக சில கருவிகளை பயன்படுத்த தொடங்கியது. பின்னர் குழுக்களிடையே தொடர்புறுதல் பேச்சு வடிவத்தில் அசைவியக்கமாக ஆரம்பித்தது. அன்றைய நாகரீக மனித சமூகத்தின் முதல் புரட்சியே வாழ்வு பற்றிய உன்னதத்தை, வெளிப்பாட்டை அறிந்து கொண்ட நிகழ்வு தான் என்கிறார் ஒசலான். இந்த சமூக வரலாறு ஆயிரக்கணக்கான ஆண்டுகளுக்கு முந்தைய, அதாவது நாகரீகங்களின்  தோற்றத்திற்கு முந்தையதுமாகும். ஆதிகால பாலியல்முறை, மிருகமுறை, திருமண உறவு முறை, குடும்ப அமைப்பு, தந்தைவழி சமூகம், பல்தெய்வ வழிபாட்டு முறை, ஒரிறை வழிபாடு, பூசாரி முறை, தீர்க்க தரிசனம் போன்றவை மனித இனத்தை குறிப்பிட சமூக ஒழுங்கிற்கு உள்ளாக்கி, அவனை உயிரியல் ரீதியான வேட்கையிலிருந்து விடுவிப்பதற்கான ஒன்றாக இருந்தது. மேலும் அதற்கான கலாசார விதிமுறையாகவும் இருந்தது.  இதன் தொடர்ச்சியில் சடங்குள், வழிபாடுகள்,பலிகள் ஆகியவை அவனின் சமூக பலத்தை வெளிப்படுத்துவதற்கான கூறுகளாகவும் இருந்தன. இம்மாதிரியான செயல்முறைகள், நடத்தைகள் ஆதிமனிதனை மிருகங்களிடமிருந்து வேறுபடுத்தி அவனுக்கு சரியான , தெளிவான வடிவத்தைக்கொடுத்தன. மேற்கண்ட முறைகள் தான் அவனுக்கான கலாசார பாரம்பரியத்தை தோற்றுவித்தன. அதோடு நாகரீகத்தின் சரியான தோற்றப்பாடாகவும் இருந்தன.

 

 

நவகற்காலத்தில் விவசாய புரட்சியானது வர்க்க சமூக வெளிப்பாட்டின் இரண்டாம் கட்டமாகும். இதன் பொருளாதய, அறிவு சார் நடவடிக்கையானது பிந்தைய தொழில் புரட்சி காலம் வரைக்கும் நீடித்தது. இதன் முக்கிய கூறான விவசாய கட்டமைப்பு சுமார் ஆயிரம் ஆண்டுகாலம் நீடித்தது. முதலாவதாக விவசாயம் மற்றும் கால்நடை வளர்ப்பின் மூலம் பெறப்படும் பொருட்கள் உலகம் முழுவதிற்குமான மூலப்பொருட்களின் அடிப்படையை தோற்றுவித்தது. மேலும் தாதுக்களின் சுரண்டலையும் ஆரம்பித்து வைத்தது. இரண்டாவதாக நம்மின் பல கருத்துருக்கள், மொழி வெளிப்பாடுகள் போன்றவை இச்செயல்பாடுகளின் தாக்கமே. மேலும் ஐரோப்பா அல்லாத சமூகங்கள், மத்திய கிழக்கு சமூகங்கள் ஆகியவை குறிப்பிட்ட கட்டத்தில் தன்னம்பிக்கையை பெறுகின்றன. மேலும் தற்கால அரசியல் வாழ்க்கைக்கு தேவையான  படிப்பினையை அவை வரலாற்றிலிருந்து பெறுகின்றன.மேலும் சுமேரிய நாகரீகத்தின் அல்லது சமூகத்தின் முக்கிய கூறாக பாலியல் பேதம் இருக்கிறது. பெண் அந்த நவ கற்கால யுகத்தில் உற்பத்தி சக்தியாக மிக முக்கிய பாத்திரம் வகித்தாள். விவசாயமும், மிருகங்களின் வீட்டுமயமாக்கலும் அவள் இல்லாமல் பரிணாமமடையவில்லை. நிலையான குடும்ப வாழ்க்கை முறையானது , குழந்தை வளர்ப்பு முறையோடு சம்பந்தப்பட்டு பெண்ணின் தேவை சார்ந்ததாக இருந்தது. மண்பாண்டம் செய்தல், நெசவுத்தொழில், தானியங்கள் அரைத்தல் போன்றவை மையச்செயல்பாடுகளாக இருந்தன. உறவு முறைகள் பெண்வழி அல்லது தாய்வழி சமூக அமைப்பு முறையில் இருந்தன. மேலும் சுமேரியர்கள் மத ரீதியான பல குறியீடுகளை கண்டறிந்தனர். மேலும் பெண் கடவுள்கள் அவர்களின் வாழ்வியலில் பெரும் தாக்கத்தை செலுத்தினர். மேலும் கோவில்களில் ஆண் பூசாரிகளுக்கு இணையாக பெண் பூசாரிகளும் இருந்தனர். ஆனால் குடும்பத்தில் இரண்டாம் இடத்தில் இருந்தனர். ஆனால் அதே நேரத்தில் சுமேரிய/மெசபடோமிய சமூகத்தில் பெண்களின் இடம் வீழ்ந்து விடவில்லை. பிந்தைய தொடர்ச்சியில் சுமேரியர்களால் திருமணம் நிறுவனப்படுத்தலுக்கு உள்ளானது. திருமணத்தை நிறுவனமயமாக்கிய உலகின் முதல் நாகரீகம் சுமேரிய நாகரீகமே. விவசாயத்தை அடிப்படையாகக் கொண்ட நவகற்காலத்தில் நாகரீக சமூகம் அதற்கான சொந்த விதிமுறைகளுடன் கூடிய நகரமயமாக்கலை தேர்ந்தெடுத்தது. இதன் தொடர்ச்சி தான் அரசு என்பதன் உருவாக்கம். மனித சமூகம் முன்னெப்போதும் இல்லாத வகையில் மறு கட்டமைப்புக்கு உள்ளானது. அதாவது பொருளாதார நலன்களை அடிப்படையாக கொண்ட படிநிலை சமூகம் தோற்றுவிக்கப்பட்டு மையப்படுத்தப்பட்ட அரசு என்பது உருவானது.  நடைமுறை வாழ்க்கையானது மிகப்பெரிய மற்றும் சிக்கலான சமூக சூழலில் புதிய மனச்சித்திரத்தை தோற்றுவித்து புதிய நிறுவனங்களுக்கான தேவையை வலியுறுத்தியது. எழுத்து செயல்பாடு, பொருட்களை கணக்கிடுதல், காலநிலை மதிப்பீடு, மருத்துவம், கல்வி போன்ற துறைகள் சார்ந்து சிந்திப்பதற்கான தேவையை சுமேரிய சமூகம் தொடர்ந்திருந்தது.

 

 

நாகரீக சமூகத்தின் மிகப்பெரும் குணாதிசயமாக இருந்த சிந்தனையும், செயல்பாடும் சுமேரிய, மெசபடோமிய நாகரீகங்களில் இயங்கியல் அடிப்படையில் இருந்தது. அவர்கள் வானத்தை அனு என்றும், பூமியை என்கி என்றும் அழைத்தனர். அது ஆண், பெண் என்ற இருமையுடன் உவமைப்படுத்தப்பட்டது.  என்கி ஆணோடு உவமைப்படுத்தப்பட்டது. அனு பெண்ணோடு தொடர்புபடுத்தப்பட்டது. இவை இரண்டின் புணர்தலில் உலகம் இயங்குகிறது என்பதை சுமேரியா, மெசபடோமிய மற்றும் பாபிலோனிய சமூகங்கள் நம்பின. மேலும் கிமு இரண்டாயிரம் நூற்றாண்டில் பெண் தெய்வ வழிபாடு மற்றும் இது சம்பந்தமான தொன்ம சொல்லாடல்கள் அனைத்தும்  படிப்படியாக மதிப்பிழக்க தொடங்கின. இந்த காலகட்டத்தில் தான் சமூகத்தின் மேலடுக்கில் ஆண் மையப்படத்தொடங்கினான். பெண்கள் தங்கள் சமூக அந்தஸ்தை இழக்கத்தொடங்கினர். அன்றைய நாகரீக சமூகம் மிகப்பெரும் கருத்தியல் மற்றும் அறவியல் மாற்றத்திற்கு உள்ளானது. இது தான் சுமேரிய, மெசபடோமிய, பாபிலோனிய நாகரீக சமூகத்தில் மிக முக்கிய காலகட்டம் என்கிறார் ஒசலான்.

 

 

ஒசலானின் சிந்தனைகளை பொறுத்தவரை அவர் பேரரசு மற்றும் காலனியம் அன்றைய நாகரீக சமூகங்களில் எவ்வாறு உருவானது என்பதைப்பற்றி விரிவாக ஆராய்ந்தார். சுமேரிய சமூகம் முழுவதையும் வெற்றிக்கொண்டு அவற்றை மையப்படுத்தப்பட்ட அக்காடிய அரசுடன் இணைத்தவர் சார்கன். சார்கன் பாபிலோனியாவின் மையப்பகுதியில் தன் ஏகாதிபத்திய அரசிற்கான தலைநகரை அமைத்தார். அது அப்பிரதேசத்தின் எல்லாவற்றையும் உள்வாங்கி கபளீகரம் செய்ய ஆரம்பித்தது. மேலும் அப்பிரதேச மக்களின் சொத்துக்கள், உடைமைகள் அனைத்தும் கொள்ளையடிக்கப்பட்டன. அதனை எதிர்த்த பலர் கைதிகளாக சிறையில் அடைக்கப்பட்டனர். இதனை தொடர்ந்து சார்கன் படிப்படியாக  தன் அரச எல்லைகளை பரந்து பாயும் நீரோட்டமாக விரிவுபடுத்தத்தொடங்கினார். அவரின் நோக்கம் தன் அரச எல்லை என்பது உலகின் நான்கு மூலையாக இருக்க வேண்டும் என்பதே. ஆக சுமேரிய நாகரீகமானது சார்கானின் செயல்பாடு காரணமாக பல இனங்களை உள்ளடக்கிய, ஏகாதிபத்தியமாக மாறத்தொடங்கியது. சுமேரிய நாகரீகத்தின் இந்த மாறுபாடானது உலகின் மற்ற நாகரீகங்களின் தோற்றப்பாட்டிற்கு காரணமானது.இந்நிலையில் சார்கனின் அக்காடிய அரசானது  கிமு 2350 முதல் 2250 வரை நூறு ஆண்டுகாலம் நீண்டது. கிமு 2000 ஆம் ஆண்டில் சுமேரிய அரசானது அமோரிய இனக்குழுக்களின் தொடர்ந்த தாக்குதல் காரணமாக பாதிப்புக்குள்ளானது. ஒரு கட்டத்தில் அமோரிய அரசனான ஹமுராபி தலைமையிலான படைகள் சுமேரிய பகுதிகளை கைப்பற்றியது. இதனால் சுமேரிய நாகரீகம் மற்றும் கலாசாரம் முழுவதும் அதன் கட்டுப்பாட்டில் வந்தது. பாபிலோனியாவை தன் தலைமையிடமாக கொண்ட ஹமுராபி சுமேரியாவின் எல்லாவித அதிகாரங்களையும் கையிலெடுத்துக்கொண்டார். மேலும் சுமேரிய மொழிக்கு பதிலாக அக்காடிய மொழி ஆட்சி மொழியானது. மேலும் அக்காடிய மொழியின் வேர் என்பது அசிரிய மற்றும் சால்டிய மொழிகளாகும். மேலும் அக்காடிய மொழி மெசபடோமியாவான இன்றைய ஈராக்கில் பேசப்பட்டு வருகிறது.

 

 

ஹமுராபியின் பாபிலோனியாவானது சுமேரியாவின் சகல வித கலாசார கூறுகளையும் உள்வாங்க தொடங்கியது. இதன்காரணமாக அதன் மூளையும் சகலவித உறுப்புகளுமாக பாபிலோனிய கலாசாரம் மாறியது. மேலும் அதன் முழு மொழிவளங்களும் பாபிலோனியாவாக மாறியது. அதன் இறையியல் மற்றும் இலக்கிய கோட்பாடுகள் அனைத்தும் பாபிலோனியாவாக மாறியது. இது உலக வரலாற்றின் பக்கங்கள் முழுவதும் நிறைந்தும் காலத்தொடர்ச்சியாக மாறியது. மேலும் அக்காலத்தில் கணிதம் மற்றும் வானவியலில் குறிப்பிடத்தக்க கண்டுபிடிப்புகள் நிகழ்த்தப்பட்டன. மேலும் பல அசிரிய அரசுகளால் இது வளர்த்தெடுக்கப்பட்டது. மேலும் பிந்தைய பல ஏகாதிபத்திய அரசுகள் சுமேரிய நாகரீகத்தை நாசம் செய்தன. இவற்றின் கருத்தியல் மற்றும் கலாசார பங்களிப்புகள் மட்டுப்படுத்தப்பட்டன. இந்நிலையில் கிமு முதலாம் நூற்றாண்டில் சுமேரியாவானது தன் மொழி உட்பட அனைத்தையும் இழந்தது. அதன் பரிணாமம் இன்னொரு கட்டத்தை நோக்கி நகர்ந்தது. இவ்வாறாக சுமேரிய நாகரீகம் உலக வரலாற்றில் பெருந்தாக்கத்தை செலுத்திய ஒன்றாக கிமு 4000 முதல் கிமு 2000 வரை தொடர்ந்தது. உலகின் வேறு எந்த நாகரீகமும் வரலாற்றில் இந்த அளவுக்கு மனித இனத்தின் மீது அதிக தாக்கத்தை செலுத்தவில்லை. மேலும் வேறு எந்த நாகரீகமும் சுமேரியா மாதிரி அடிமை சமூகத்தையும், அதன் மேல் கட்டுமான வடிவத்தையும் தோற்றுவிக்கவில்லை. வரலாற்றின் முன் சுவட்டில் சுமேரிய அதற்கான ஒட்டுமொத்த கருத்தியல், கலாசாரம், சமூக மற்றும் பொருளாதார கூறுகளை உள்ளடக்கிய ஒன்றாக இருக்கிறது. இது வரலாறு நமக்கு தரும் சிறந்த பாடமாகும்.

***

Advertisements